Emakumeok mugak gaindituz

2021eko ekainaren 5ean, Nizan bildutako Europako milaka emakume feministekin batera, kometak airera jaurtiko ditugu Bilbon borrokaren eta itxaropenaren ikur gisa, munduaren luze-zabalean igarotze librerako eskubidea aldarrikatzeko.

2015etik geroztik, Europan mugak itxi eta migrazioa kriminalizatzen duten politikak indartu dira. Politika horiek hainbat pertsonaren ekonomia mafiosoak, indarkeriak eta abusuak bultzatzen dituzte, eta eragin berezia dute emakumeengan, Europako migratzaileen % 54 baitira. Kometek mugak gainditzeko gure nahia irudikatzen dute. Hemen jaio ginenok, denbora daramagunok, ondoren iritsi garenok, denok bizi gara lur berean, pertsona guztientzako aniztasuna eta eskubideak izan behar dituen lur horretan.

Bazterketaren mugak gainditu nahi ditugu. Gizon armatuek zaindutako elorri-alanbrez betetzen direnak. Emakumeen gorputzekin eta lanekin trafikatzen dituztenak. Egunero bizitzak galtzen diren itsasoen mugak. Giza eskubideak defendatzen dituztenen aurkako jazarpena.

Garraiolariek zeharkatzen dituzten mugak gainditu nahi ditugu, emakume pobretu eta esplotatuak, beren bizkarrean salgai zentzugabeak kargatzen. Gure elikagaiak biltzen dituzten emakumeenak, marrubien eta berotegien langileak, esplotatuak eta bortxatuak. Erdialdeko Amerikako mugak, indarkeriaren, gosearen eta desberdintasunen karabana luzeetan ihes egiten dutenak hiltzen dituztenak.

Emakumeak abortatzea erabakitzeagatik kartzelera eramaten dituzten legezko mugak gainditu nahi ditugu. Ehungintzako eta zaintzako lanetan eskubide eta baldintza duinik ukatzen dituztenak. Jarrera arrazista eta xenofoboenak eta iristen zaizkigunak jasotzen ditugun arrazakeria instituzionalarenak. Identitate eta aukera sexual desberdinak dituztenak espetxeratzen eta kanporatzen dituztenak.

Ekainaren 5ean, emakume eta neskatila guztiak ikusarazi nahi ditugu -munduko migratzaileen erdiak baitira-, muga guztiak zeharkatuz: lehorrekoak, itsasokoak, legezkoak, lanekoak, afektiboak…
Bidaia, kometekin sinbolizatzen dugu, mugitzen, askatzen, asmatzen eta sortzen diren emakumeen hegaldia eta zeharkaldiak irudikatzen dituztelako. Kometek mugak gainditzen dituzte eta, aldi berean, elkartu egiten dituzte: beren lokarri finarekin, lurrari, bizitzari, errotzeko, zaintzeko eta hartzeko beharrari baieztatzen zaizkio. Kometek emakumeen proiektuei eta irrikei buruzko mezuak eramango dituzte: bidearen zailtasunei, oztopoei, baina, batez ere, bizitza duina eraikitzeko nahiari buruzkoak. Kometen kolore, mezu eta forma desberdinek gure dibertsitateak sinbolizatzen dituzte, gure azalaren kolorean, gure sinesmenetan, gure pentsamoldean, gure gorputzak, desirak, lanak, amodioak ulertzeko moduan.

Kometek hegan egingo dute Bilboko airean, Zirgarien oroimenarekin batera. Emakume horiek gabarrak arrastaka zeramatzaten zirga astunekin, eta oso lan gogorra egin zuten, iraganean bezala. Memoria honek beste oraina eta etorkizun bat eraikitzeko deia ere egiten digu.

Mundu asko sartzen diren mundu bat nahi dugu. Mundua aldatu nahi dugu geure burua askatuz. Eskubide guztiak nahi ditugu emakume guztientzat.
Hautsi ditzagun hiltzen, esplotatzen, zatitzen eta kanporatzen dituzten mugak! Eraiki ditzagun eskubide berberak dituzten herriak, auzoak, hiriak, herrialdeak! Ez gara kalera ateratzen salatzeko bakarrik, bizitzeko eta elkarrekin bizitzeko modu berri bat proposatu nahi dugu.

Ekainaren 5ean, gure proposamenak eta gure konpromisoak irakurriko dira, Nizan egingo den ekitaldearekin batera; han, Europako beste milaka emakume eta gizon, kausa beraren alde borrokan egongo dira. Elkarri entzun eta hitz egin nahi dugu, aurre egin eta aurrera egin. Dogmarik gabeko emakume feministak gara, mugarik gabekoak, aniztasunean eta eskubide-berdintasunean aurrera egiten dutenak.